Cuerpo defende que'l debate sobre la mengua de xornada "nun ye un asuntu de trámite"

L'asturiana Paloma Marín toma posesión como vicepresidenta de la CNMV

El ministru d’Economía, Carlos Cuerpo, defendió esti miércoles la necesidá de debatir fondamente la mengua de la xornada llaboral porque "nun ye un asuntu de trámite" y tien que cuntar "con toles garantíes".

En declaraciones a los medios enantes d’asistir al actu de toma de posesión del nuevu presidente de la CNMV, Cuerpo quixo "desmentir dafechu" l’acusación de que bloquiare’l debate sobre la mengua de xornada formulada pola vicepresidenta y ministra de Trabayu, Yolanda Díaz.

"Dede Economía lo que tamos faciendo ye dar prioridá dafechu a esti proyectu", solliñó, p’apuntar que’l Ministeriu de Trabayu unvió esti martes el pidimientu de discutir la mengua de xornada na Comisión Delegada d’Asuntos Económicos, pasu enantes de la so remisión al Conseyu de Ministros.

Declaraciones del ministru d’economía enantes d’asistir al actu de toma de posesión del nuevu presidente de la Comisión Nacional del Mercáu de Valores, Carlos San Basilio, y de l’asturiana Paloma Marín, que tendrá’l cargu de vicepresidenta del organismu supervisor.

Marín destacó la importancia de l’apertura y averamientu de la CNMV a la sociedá pa ganar en confianza y credibilidá.